ՆԱՐԻՆԷ ՆԵՐՍԻՍՅԱՆ

Երկու հատվող բուրգերից ծնվում է Նորը

Tag: Սեռական բռնություն

Սեռական բռնություն

Առաջին անգամը խմած վիճակում

1. Բարև Ձեզ տիկին Նարինե: Ինձ միայն մի հարց է շատ տանջում: Ինձ հետ մի դժբախտ, եթե կարելի է այդպես ասել, դեպք է տեղի ունեցել: Հիմա անգամ զզվանք եմ զգում, երբ պետք է խոսեմ այդ մասին: Սիրածս տղան հրավիրեց ինձ սուրճ խմելու մի վայրում, որտեղ մարդ չէր խանգարի: Մի քիչ խմեցինք և չգիտեմ թե ինչպես տեղի ունեցավ: Բայց այստեղ գլխավոր հարցը՝ մենք բաժանվեցինք զուտ այն պատճառով, որ ինձ հետ տեղի ունեցածի ժամանակ արյունահոսություն չեղավ ու նա կարծեց թե առաջին անգամը չէ: Սա ինձ համար շա~տ բարդ խնդիր է: Ես շատ եմ կարդացել այս մասին և գուցե հասկանում եմ, բայց հիմա, երբ նա չկա, աջքիս ոչ ոք չի գալիս և նաև մի տեսակ զզվանք եմ ապրում տղամարդկանցից:

Պատասխան

Ինձ համար մեծ ցավ է լսել նման պատմություն: Երկար մտածելուց հետո հարգելի նամակագիր, խնդիրը տեսնում եմ հենց ձեր մեջ: «Չգիտեմ էլ ինչպես տեղի ունեցավ»-ը խոսում է հոգեսեքսուալ խորը ինֆանտիլության մասին (Ինֆանտիլություն-թարգմանաբար մանկամտություն), Նշանակում է դուք չեք ճանաչում ձեր սեռական կիրքը, չունեք իմացություն տղամարդու սեռական ցանկությունների, սեռական վարքի մասին: Այդ պահին ձեզ առաջնորդել են տարերային ուժերը, դուք բոլորովին գիտակից չեք եղել ձեր կյանքի ամենապատասխանատու քայլն անելիս: Ոգելից խմիչքի ազդեցությունը խորացրել և նպաստել է գիտակցության ի սպառ անջատմանը:Սեռական նման վարքը, երբ զուգընկերներից մեկը անգիտակից է, կարելի է համարել սեռական բռնության մի ձև, ինչը կնշանակի որ դուք սեռական բռնության «զոհ» եք դարձել: Դա մեծ սթրես է հոգեկանի համար և զզվանքը տղամարդկանցից այն պաշտպանական միջոցն է, որով դուք այժմ պաշտպանվում եք: Սա շատ լուրջ խնդիր է, որը հետագայում մեծ բարդությունների առաջ կարող է կանգնեցնել: Պատմությունը բարդացել է նրանով, որ կուսազրկումը արյամբ չի ուղեկցվել, մի հանգամանք, որը պայմանավորված է կուսաթաղանթի տեսակով՝ այն պարզապես շատ առաձգական է եղել և պատռվելու փոխարեն լայնացել է՝ բացելով մուտքը դեպի հեշտոց: Տղայի կողմից կուսության կասկածը և դրա պատճառով ձեզ լքելը կրկնակի հարված է եղել ձեր հոգեկանի համար, հատկապես եթե նա ձեզ համար կարևոր և մտերիմ անձ է եղել, ում վստահել եք: Կարծում եմ խնդիրը, որի առաջ կանգնած եք մասնագիտական միջամտության կարիք ունի, որպեսզի այս պատմությունից կարողանք առողջ դուրս գալ՝ առանց տրավմայի:

Փակել

Սեռական բռնություն

Դեռ փոքր տարիքում՝ ընկնելով վատ, շատ վատ շրջապատ, գուցե իմ կամքից ակախ գուցե իմ կամքով, մի քանի սեռական հարաբերություններ եմ ունեցել, իսկ ավելի շուտ դրանց մի գուցե հարաբերություն էլ չի կարելի անվանել, սեռական ինչ-որ մի բան: Դա եղել է մինչև 8-9 տարեկան, դրանից հետո ինչ-որ անհասկանալի հանգամանքներում սկսեցի ձեռնաշարժությամբ զբաղվել: Թեպետ հիիմա հնարավորինս քիչ, նույնիսկ ընդհանրապես չեմ զբաղվում, անկեղծ ասած, անգամ վերջերս եմ իմացել, որ այդ երևույթը որպես այդպիսին ՙՙՁեռնաշարժություն՚՚ կկոչվի: Ինչևէ: Ինձ հիմա, իսկապես, շատ անհանգստացնում է մի հարց, արդյոք հնարավոր է կուսությունից զրկվել այդ տարիքում, ինչ-ոչ չբավարարված սեռական գործողության ժամանակ: Խնդրում եմ, հնարավորության դեպքում ինձ անպայման օգնել, այս հարցն ինձ համար իսկապես մղձավանջային է դարձել:

Պատասխան

Ցավալի է լսել, որ երեխան սեռական կյանքի մեջ է ընդգրկված եղել, դա միանշանակ եղել է ոչ ձեր կամքով, դուք այդ տարիքում չէիք կարող գիտակցական սեռական գործողություններ կատարել, ուստի և չէր կարող դրսևորվել ձեր կամքը: Ձեր հետ եղածը այլ կամքի, այլ գիտակցության իրագործում է եղել, դուք այդտեղ միանշանակ զոհի կարգավիճակում եք եղել, իբրև միջոց, ում օգտագործել են սեռական շահադիտությամբ: Սարսափելին այն է, որ նման տիպի շահարկման ենթարկելով՝ քմահաճորեն ձև են տվել ձեր սեռական մղումին, ձեր մեջ ձևավորելով որոշակի սեռական հակումներ և սովորություններ, որոնց հետ դուք ստիպված եք հիմա ապրել: Ձեռնաշարժությունը այդ սովորություններից մեկն է: Ձեր սեռականությունը խեղաթյուրվել է և ձեր ձևավորման մեջ այսպիսով տեղ են գտել երևույթներ, որոնք ձեր հետ անքան էլ կապ չունեն, թեև դուք դրանց վերաբերվում եք իբրև սեփական զգացողություններ և ցանկություններ: Կուսաթաղանթի խնդիրը ձեր դեպքում ամենաաննշան հարցն է, որը ձեզ պիտի հուզի, վնասվել է այն թե ոչ, բոլորովին էական չէ, քանի որ կան շատ ավելի հիմնավոր և առողջությանը վերաբերող հարցեր, որոնք պետք է լուծում ստանան առաջնահերթ: Իսկ եթե այնուհանդերձ կուզենաք կուսաթաղանթի ամբողջականությունը ստուգել, ապա պետք է դիմեք մասնագետին, դա շատ հեշտ հետազոտություն է՝ զննում անզեն աչքով՝ գինեկոլոգիական բազկաթոռում։

Փակել


Առաջին սեռական հարաբերություններս ունեցել եմ 12 տարեկանում, անծանոթ տղայի հետ, 3 անգամ, ում այլևս երբեք չեմ տեսել: Դրանից հետո սեռական կյանքով չեմ ապրում: Այժմ 19 տարեկան եմ, 2 տարի է ընկեր ունեմ, բայց սեռական ցանկություն չեմ ունենում երբեք: Ինքանաբավարարմամբ չեմ զբաղվում և սեքսի մասին մտքերն անգամ տհաճ են ինձ: Արդյո՞ք դա կարող է կապված լինել նրա հետ, որ վաղ տարիքում եմ ունեցել առաջին հարաբերություններս: Նախապես շնորհակալություն:

Պատասխան

Այո, հնարավոր է։ Խնդիրն այստեղ նրանումն է, որ 12 տարեկանում պատանին իր կամքով և գիտակից որոշմամբ չի կարող սեռական կապ ունենալ տղայի հետ: Հետազոտությունները ցույց են տալիս, որ այդ տարիքի աղջիկները հաճախ չեն էլ պատկերացնում՝ ինչ է կատարվում իրենց հետ, կարելի է ասել նրանք սեռական ոտնձգության զոհ են դառնում: Նման դեպքերում սեռական զզվանքը պաշտպանական միջոց է այն ցավի դեմ, որը դուք չեք ուզում վերապրել կապված այդ տղայի՝ ձեր հանդեպ գործած բռնության հետ: Հնարավոր է դուք ունեք հետտրավմատիկ սթրեսային խանագարում և սեռական ցանկության արգելակում, հոգեսեռական առողջության լուրջ խնդիրներ, որոնք պարտադիր կերպով մասնագիտական միջամտություն են պահանջում ապագա ընտանիքում սեռական ներդաշնակ կյանք ունենալու համար:

Փակել


Չարաշահված հավատ

Սեռական բռնության ենթարկված կանանց հիմնական մասը լռում են իրենց հետ տեղի ունեցածի մասին և կրում այդ փորձի ամոթալի հիշողությունը իրենց կյանքի ողջ ընթացքում։ Բազմաթիվ սեռական խնդիրներ իրենց ակունքում ունեն մանկության կամ վաղ պատանեկության տարիներին տեղ գտած սեռական տրավմատիկ փորձառություններ։

Խնդիրն այստեղ այն է, որ այդ կանայք ամաչելու ոչ մի լուրջ հիմքեր չունեն, քանի որ սեռական բռնության զոհ դառնալը իրենց մեղքով չի եղել։

Աշխատելով սեռական տրավմաներ տարած բազում կանանց հետ՝ ինչ-որ մի պահ սկսեցի նկատել ու հետագայում նաև համոզվեցի, որ բռնություն տարած կանայք մի շատ առանձնահատուկ հատկություն ունեն։ Նրանք հենց ամենասկզբից հավատում են տղամարդու՝ մարդ լինելուն։ Այդպիսի կանայք նախ և առաջ տղամարդու մեջ տեսնում են մարդկային էություն, արժանապատվություն ունեցող էակի, ով չի կարող բռնություն գործադրել երեխայի հանդեպ։ Ու հենց այս վերաբերմունքն է, որ աղջիկներին դարձնում է սեռական բռնության զոհ, քանի որ բռնարարը չարաշահում է  աղջնակի հավատը և բռնարարի անձի հանդեպ վստահությունը: Այն աղջիկները, ովքեր ի սկզբանե թերահավատ են տղամարդու նկատմամբ, սեռական բռնության զոհ ավելի քիչ են դառնում, որն այս աղջիկներին առավել իմաստուն չի դարձնում նախորդ խմբի համեմատ, մի գուցե նաև՝ ճիշտ հակառակը։

Կարդալ

Պետք չէ բռնություն ասելով հասկանալ միայն ֆիզիկական բռնության դեպքերը, շատ հաճախ սեռական բռնությունը զույգերի հարաբերություններում հանդես է գալիս հոգեհուզական չարաշահման տեսքով։ Ընդհանուր առմամբ, պատկերավոր կարելի է ասել՝ երբ մարդկային ինքնությունը կորցրած տղամարդը թափանցում է կնոջ աշխարհ (կամ ավելի ստույգ՝ ներխուժում է), նա շտապ-շտապ, ագահաբար սկսում է « գրպանները լցնել այդ աշխարհի գանձարաններում պահված թանկարժեք գոհարեղենով ու քարերով, ոսկեղենով ու ակնեղենով», մի խոսքով՝ թալանում է գանձարանը, ինչքան կհասցնի, քանի դեռ դռները բաց են։ Ի՞նչ է անում կինն այդ ընթացքում, նա ապշահար, զարմացած ու վախեցած հետևում է այդ տղամարդու վարքին և պապանձվում ցավից, որը նա ապրում է ոչ թե իր, այլ հենց այդ տղամարդու անկման համար, ում նա հավատացել ու ներս էր թողել…

Չարաշահված կանանց հետ զրուցելիս նկատել եմ նրանց զարմանքը, թե ինչպես կարելի է չհարգել ուրիշի ունեցվածքը, չգիտենալ պարզապես նայել՝ առանց ուզելու, չգիտենալ տեսնել, տեսնել ու հիանալ, հիանալ ու ակնածել։ Այդ կանայք ապշահար զարմանում են, որ տղամարդը կարող է այդչափ հիմար գտնվել ու իրեն զրկել աշխարհի ամենաչքնաղ վայելքից, որն է՝ կնոջ վստահությունը, երբ դռները երբեք չեն կողպվում։ Չարաշահված կանայք ապագայում այլևս մեծ դժվարությամբ են հավատում տղամարդուն և շատ հաճախ նրանց մոտ իբր հետևանք զարգանում են սեքսուալ մի շարք խնդիրներ՝ վագինիզմ, սեռական ցանկության բացակայություն, սեռական գրգռման խանգարում։

Բռնության ենթարկված ու չարաշահված կանայք ամաչում են ոչ թե իրենց, այլ բռնարար տղամարդու վայրագ վարքից, քանի որ նրան պատկերացնում էին ազնիվ ու ազատ ոգի կրող անձնավորություն, մինչդեռ իրականում գործ ունեն կրքի կրակով կուրացած ան-ասունի հետ, չէ, ավելի վատ՝ քան կենդանու, որը գոնե արդարացում ունի ի ծնե այդպիսին լինելով։

Սիրելի կանայք, տղամարդու կողմից սեռական բռնության և չարաշահման զոհ դառնալը ձեր մեղքը չի եղել, պետք չէ ամաչել ու փակվել ամբողջ կյանքում նմանատիպ փորձառություն ունենալու դեպքում։ Ձեր հավատը տղամարդու ազնվությանը և մարդկային ոգու ազատությանը միանգամայն արդար ու վեհ է, իսկ նմանատիպ իրավիճակներում զոհ գնալու փոխարեն պետք է ուղղակի պաշտպանվել և անգամ հարձակվել։

Փակել

© 2017 | ՆարինԷ Ներսիսյան | Բոլոր իրավունքները պաշտպանված են |

Besucherzahler
счетчик посещений