ՆԱՐԻՆԷ ՆԵՐՍԻՍՅԱՆ

Երկու հատվող բուրգերից ծնվում է Նորը

Tag: սեռական խնդիր

Վագինիզմ

Ներթափանցման խանգարում

1. Բարև Ձեզ բժշկուհի: Ես 23 տարեկան եմ ու արդեն երկու ամիս է ամուսնացած եմ, սակայն ունենք հետևյալ խնդիրը. ամուսնուս առնանդամը մինչև վերջ առաջ չի գնում՝ հենց այդ պահին անտանելի ցավ եմ ունենում: Ինչի՞ց է այդպես, և ի՞նչ խորհուրդ կտաք: Նման պարագայում հնարավո՞ր է հղիանալ: Նախապես շնորհակալություն:

Պատասխան

Բարև Ձեր խնդիրը կապված է հեշտոցի մկանային լարվածության հետ, որը հասնում է ախտաբանական աստիճանի՝ փակելով հեշտոցի լուսանցքը: Այս խնդիրը ունի շատ խորքային պատճառ, որը ձեր գիտակցությունից դուրս է, դրա համար դուք ի զորու չեք տեսնել այն և հաղթահարել սեփական ուժերով, խնդիրը հոգեսեռական կոնֆլիկտ է, որը ծագել է ձեր զարգացման ընթացքում այն պահին, երբ ձեր սեռականության արթնացումը բախվել է ձեր բնության այդ դրսևորումը անընդունելի համարող արտաքին հեղինակավոր ազդեցությանը: Այդ ժամանակ դուք մերժել եք ձեր կանացի բնությունը վախից դրդված ու մինչ այսօր կրում եք այդ մերժման հետևանքները: Այս խնդիրը պահանջում է բուժում, որը նաև կօգնի հեշտ հղիացմանը, քանի որ այսպես հղիություն թեև չի բացառվում, բայց հավանականությունը շատ ցածր է:

Փակել

2. Ես արդեն երկու տարի է ամուսնացել եմ, բայց այդպես էլ սեռական հարաբերություն չեմ ունեցել վախիս պատճառով, մի քանի տարբեր բժիշկների մոտ բուժում եմ անցել, բայց անարդյունք: Հնարավոր է իմ մոտ անբուժելի խնդիր կա:

Պատասխան

Հավանաբար ձեզ մոտ բուժել են վագինիզմ կոչվող հիվանդությունը, մինչդեռ ձեզ մոտ առկա է այլ հիվանդություն։ Ի դեպ այսօր, ժամանակակից գիտության հետազոտություններով պարզ է դարձել, որ վագինիզմը ունի մի քանի ենթատիպեր, որոնց բուժումները տարբեր են։ Պետ ք է ասել, որ այսօր վագինիզմ դիագնոզը ընդհանրապես փոխարինվել է ներթափանցման խանգարում ախտորոշմամբ և դրա պատճառն այն է, որ երբեմն ներհրման անհնարինության խնդիրը ոչ թե հեշտոցամուտքի մկանների ակամա սպաստիկ կծկումն է, այլ ներթափանցման նկատմամբ ֆոբիկ նյարդային ռեակցիան, այսինքն անհիմն ու անկառավարելի վախը: Այս դեպքում բուժումն ուղղված է ոչ թե բուն վագինիզմին, այլ այդ ֆոբիայի հաղթահարմանը, որը բոլորովին այլ կարգի բուժում է: Հիմնականում այստեղ կիրառվում է հոգեթերապիայի մեթոդը, ընդ որում հոգեթերապիայի տարբեր եղանակներ, իհարկե կան նաև դեղեր, որոնք կասեցնում են այդ ֆոբիկ ռեակցիան: Ոչ մի դեպքում մի հուսահատվեք, այլ շարունակեք ձեր բուժումը:

Փակել

Վագինիզմ

1. Հարգելի բժիշկ ես արդեն 20 օր է ինչ ամուսնացած եմ, բայց սեռական հարաբերություն տեղի չի ունենում (կուսազրկում), որի պատճառը իմ լարվածությունն է, շատ եմ լարվում և առնանդամը չի ներթափանցում, ես նախապես տրամադրվում եմ, որ չլարվեմ, սակայն դա ներքուստ է ստացվում, խնդրում եմ կարող եք ասել ինչն է պատճառը, ինչ կարող եմ անել:

Պատասխան

Այդ լարվածությունը, որի մասին խոսում եք, ունի իրպատճառը, որը մեծամասամբ կապված է սեռական կյանքի կամ տղամարդկանց հանդեպ ունեցած բացասական վերաբերմունքի հետ։ Լարվածությունը ձեր կամքով չի հայտվում, այլ առաջանում է նյարդային համակարգի վեգետատիվ հատվածով, իսկ դա այն հատվածն է, որն աշխատում է անկախ մեր կամքից և պատասխանատու է մեր կենսական գոյության համար։ Բանը նրանումն է, որ երբ դուք սեռական մերձեցման փորձ եք կատարում, ձեր ուղեղը հասկանում է, որ կյանքին սպառնացող վտանգ կա և անմիջապես ողջ մկանային համակարգը, այդթվում՝ հեշտոցամուտքի մկանը գլխուղեղից կծկման հրաման են ստանում։ Մարմինն այդ պահին կարծես թե պաշտպանվում է անտեսանելի թշնամուց` տալով նմանատիպ արձագանք: Ձեր տառապանքը սեքսոլոգիական լեզվով ասած կոչվում է վագինիզմ: Սահիվանդություն է, որը մասնագիտական օգնություն է պահանջում:

Փակել

2. Բարև ձեզ, սեռական հարաբերությունից առաջ ինձ մոտ տեղի է ունենում հեշտոցամուտքի մկանի կծկում, ուղեկցվում է ցավով, որը անհնարին է դարձնում սեռական հարաբերությունը. կարդալով ինտերնետում բազմաթիվ նյութեր, հասկացա, որ ինձ մոտ վագինիզմ է և հարկավոր է դիմել մասնագետի, և արդեն մեկ ամիս է ինձ չեմ կարող պատրաստել մասնագետի այցելելուն, կասե՞ք ինչպես է բուժվում վագինիզմը, ինչքա՞ն ժամանակում և ուզում եմ հասկանալ դեղորայքային բուժում է:

Պատասխան

Ես ինչքանով հասկցա այս խնդիրը ավելի շատ հոգեբանական խնդիր է: Այո, նշանները, որ նկարագրում եք բնորոշ է վագինիզմին: Սա հոգեմարմնական խանգարում է, այլ ոչ հոգեբանական, բուժման մեջ անպայմանորեն կիրառվում են մարմնի նյարդամկանային լարվածությունը թուլացնող միջոցներ՝ դասական կամ ալտերնատիվ բժշկության մեթոդներով: Սակայն վագինիզմի բուժամն ամենաարդյունավետ մեթոդը խոսքային թերապիան է, որի նպատակը սեփական մարմինը ճանաչելն ու կառավարելի դարձնելն է: Հատուկ պատրաստվել պետք չէ, պարզապես այցելեք և զրույցի հենց առաջին րոպեներից բժիշկը ձեզ պաշտպանվածության և ապահովության զգացում կներշնչի, դուք կզգաք, որ այս խնդրում մենակ չեք և կա մեկը, որ իր գիտելիքներով և հմտություններով ավելի ուժեղ է, քան վագինիզմը։

Փակել

3. Բարև Ձեզ: Ես 23 տարեկան եմ: Արդեն մեկ ամիս է ամուսնացած եմ, բայց մինչ օրս դեռ կույս եմ,մեզ մոտ ոչինչ չի ստացվում: Ես շատ եմ լարվում և մի տեսակ վախենում եմ, երբ ամուսինս ինչ-որ գործողություն է ձեռնարկում, ցանկությունը շատ մեծ է: Ի՞նչ խորհուրդ կտաք: Ինչպե՞ս հաղթահարենք այս ամենը: Շնորհակալություն:

Պատասխան

Ինչպես նշել է իմ հարգարժան կոլեգան, խնդիրը կոչվում է վագինիզմ և հաղթահարելի է միայն մասնագետի օգնությամբ, բուժումը տևում է առնվազն մեկ ամիս, բայց կարող է ձգվել մինչև մեկ տարի՝ եթե անձի մոտ առկա են հոգեախտաբանական լրացուցիչ խանգարումներ: Այն լարվածությունը, որի մասին խոսում եք, նյարդամկանային ախտաբանական լարվածություն է, որի պատճառը վախն է՝ հիմնականում ցավից։ Խնդիրը բավականին տարածված է հատկապես հոգեսեռական զարգացման հապաղում և հոգեսեռական ինֆանտիլություն ունեցող կանանց մոտ։ Հնարավոր է լինի նաև սեռական ցանկության բացակայության խնդիր, որը բժշկական դիագնոզ է, ուստի այս դեպքում ևս խնդրով զբաղվում է բժիշկ-սեքսոլոգը, ընդ որում բուժման մեջ պարտադիր ներգրավվում է զույգը, վերջապես չի բացառվում նաև կոիտոֆոբիա ախտորոշումը, որի բուժումը ամենաբարդն է և դարձյալ իրականացվում է սեքսոլոգիական ծառայության շրջանակներում։ Հաճախ մեր պրակտիկայում հանդիպում են ֆոբիկ վախերի Սա նշանակում է, որ կինը դեռ բավականաչափ հասուն չէ ներթափանցման ցանկը պատրաստ լինելու համար։ Կնոջ մարմնի մեջ պրում է աղջնակ՝ 5-6 տարեկան:

Փակել

4. Շատ եմ խնդրում պատասխանեք հարցիս: Ես արդեն համարյա երկու տարի է ամուսնացած եմ, ունեմ երեխա, բայց մենք չենք կարողանում սեռական հարաբերություն ունենալ: Հղիացա կարծես հրաշքով, նույնիսկ արյուն չեկավ առաջին անգամ: Հղիության ժամանակ, ներզննումի ժամանակպարզվեց, որ վագինիզմ է մոտս: Ահավոր էր ռեակցիաս ներզննման ժամանակ: Հիմա կարծես ամուսնուս մոտ ևս առաջացել են կոմպլեքսներ: Այժմ ինձ հավաքում եմ, տրամադրվում ու պատրաստ եմ լինում ակտին, սակայն չիստացվում: Վերջին ժամանակներում էլ կարծես վաղաժամ է գալիս սերմնահեղուկը ու դարձյալ ակտ չի լինում: Մի խոսքով, հարաբերություն չենք ունեում: Օգնեք, խնդրում եմ չասեք դիմեք մասնագետի՝ չեմ կարող ամուսնուս համոզել: Ես ուզում եմ, որ այսպես գոնե ինձ օգնեք, խորհուրդ տաք: Շա~տ շնորհակալություն:

Պատասխան

Դուք ներկայացնում եք այնպիսի լուրջ սեքսոլոգիական խնդիր, որն անհնար է լուծել առանց մասնագետին հանդիպելու: Պետք է գիտակցել, որ հակառակ դեպքում խնդիրը կարմատանա, կխորանա, կբարդանա ու կքայքայի ձեր ընտանքը: Մեղքը ձերը չէ, որ ձեր մարմինը չի ընդունում տղամարդու սեռական օրգանը, այնպես որ կարիք չկա անհարմար զգալ, ամաչել կամ մեղավորության զգացումով ինքնապարփակվել: Դա առողջական խնդիր է, որը ախտահարում է կանանց մոտ 20-45%-ին ըստ տարբեր վիճակագրական աղբյուրների, այն ունի բուժման հատուկ մեթոդներ, ինչպես ցանկացած այլ հիվանդություն:

Փակել

Վախ սեռական հարաբերությունից

1. Հարգելի Նարինե, ես 22 տարեկան եմ, նշանված եմ: Նշանածիս հետ հանդիպում ենք արդեն 5 տարի: Արդեն մեկ տարուց ավել է փորձում ենք սեռական հարաբերություն ունենալ, բայց վախիս զգացումը շատ մեծ է: Շատ եմ նրան սիրում ու սեռական ցանկությունս էլ նրա հանդեպ շատ մեծ է, բայց հենց պետք է ակտը տեղի ունենա, ես վախենում եմ ու չեմ թողնում: Խնդրում եմ օգնեք ինձ, զգում եմ, որ դրա պատճառով մեր հարաբերությունները վատանում են: Կանխավ շնորհակալ եմ:

Պատասխան

Սեռական վախի զգացումը բավական հաճախ հանդիպող խնդիր է: Այն կասեցնում է սեռական կյանքով ապրելու զույգի ցանկությունը և, այո, սրում միջանձնային հարաբերությունները: Սեռական վախի առաջացման պատճառն այն է, որ անձը սեռական կապի մասին ունի սխալ պատկերացումներ, կարծես այն իր մեջ մեծ վտանգ է պարունակում, ինչը կարող է վնաս հասցնել անձին և ծանր հետևանքների առաջ կանգնեցնել: Այս պատկերացումների առաջացումը տեղի է ունեցել հոգեսեռական զարգացման ընթացքում, սեռական բնույթի ինչ-որ փորձությունների հաղթահարման ժամանակ: Սովորաբար նման իրավիճակներում մեր կողքին կանգնած են լինում խորհրդատուներ՝ փորձառու ընկերուհիներ կամ անտեղյակ ծնողներ, ովքեր իրենց անձնական սխալ պատկերացումներով կարողանում են վարպետորեն սարսափ ներշնչել դիմացինին սեռական կյանքի նկատմամբ: Մանկության կամ պատանեկության տարիներին տեղ գտած այս փորձառությունները չեն մոռացվում, այլ պահվում են մեր ենթագիտակցականի շերտերում՝ իրենց դերը խաղալով հետագայում, երբ գալիս է ժամանակը սեռական ինքնադրսևորման: Այդ վախի հաղթահարումը մասնագետի օգնության կարիքն ունի, քանի որ այդ վախն իր բնույթով այնպիսին է, որ զուգակցվում է սեփական անկարողության, թերահավատության, անլիարժեքության, թուլության, հուսահատության զգացումներով, որոնք մի փնջի մեջ հանդես գալով ավելի զորեղ են անձից և հաղթում են նրան:

Փակել

Սեռերի կենսաբանական-էվոլյուցիոն նշանակությունը

Սեռային պատկանելիության կենսաբանական նշանակության իմացությունը, ասել է թե՝ ինչ է նշանակում լինել արական կամ իգական սեռի առանձնյակ, մեզ՝ բժիշկ-սեքսոլոգներին, մտածելու լուրջ տեղիք է տալիս, հատկապես մեր օրերում, երբ մարդը դիտարկվում է որպես էվոլյուցիայի ընթացքում կապիկից առաջացած կենսաբանական տեսակ։ Սեռերի կենսաբանական նշանակությանը կփորձեմ անդրադառնալ էվոլյուցիոն կենսաբանների դիտարկման տեսանկյունից, քանի որ յուրաքանչյուր կենսաբանական հատկանիշի ժառանգական փոխանցում և ամրապնդում ըստ այս մտածողների՝ հնարավոր է դառնում միայն գոյապահպանությանը սպառնացող բոլոր փորձությունների հաղթահարման պարագայում։

Սեռերն կենսաբանական-էվոլյուցիոն նշանակության մասին ամենատարածված և ընդունելի տեսությունն այսօր Գյոդակյանի կողմից մշակված տեսությունն է, որը արական և իգական սեռային պատկանելիության խորքային նշանակությանը մոտենում է այդ սեռերի վերարտադրողական գործառույթից ելնելով։ Ըստ այս տեսության՝ որպես սկզբնակետ հիմք է վերցվում այն, որ արական սեռային էակն ունի բեղմնավորման բարձր ցուցանիշ, քանի որ նրա սերմնաբջիջներն արտադրվում են անընդհատ կերպով, առանց դադարի, օրական 1մլն քանակությամբ սերմնահեղուկում հասնելով միլիոնավոր, անգամ միլիարդավոր սերմնաբջիջների։ Համարվում է, որ արական էակի «գործն» է լայնորեն (առատաձեռնորեն) տարածել իր սերմը ու բեղմնավորել առավելագույն թվով իգական էակների, այսինքն՝ բազմանալ ու գրավել հնարավորինս ընդարձակ տարածքներ: Դրա համար է, որ նրա սեռականությունն օժտված է հեշտ գրգռողականությամբ և ոչ բծախնդիր ընտրողականությամբ, ինչը դրսևորվում է դեպի նորությունը և բազմազանությունը հակվածությամբ, որի շնորհիվ հնարավոր է դառնում բեղմնավորել մեծաքանակ առանձնյակների և բացառել մյուս մրցակիցներին ասպարեզից: Արական էակը բնազդաբար ակտիվանում է (հուզական ռեակցիաների միջնորդությամբ)՝ ի պատասխան իգական էակից եկող բեղմնավորման հնարավորությունն ազդարարող սեռային նշանների (հոտեր, տեսողական գրգիռներ, առինքնող դիրք, վարքային ակտիվություններ)։ Սա ծրագիր է, որը խնայում է արական էակի ժամանակը, ուժերը և սերմնաբջիջները, որոնք հակառակ դեպքում կվատնվեին ոչ պտղաբեր իգական էակին ուշադրություն տալով:

Կարդալ ավելին

Արական սեռականությունը պերմանենտ (մշտական) բնույթ ունի, բացառությամբ սերմնաժայթքումից հետո ընկած ժամանակահատվածի, որում նա անդրդվելի է նյարդահումորալ վերականգնողական աշխատանքների պատճառով: Արական սեռական վարքը դրական ամրապնդման պահանջ ունի, որպեսզի սերմնաժայթքումից հետո նա նորից շահագրգռված լինի նույն եռանդով ջանալու, այդ իսկ պատճառով սերմնաժայթքումը ուղեկցվում է օրգազմի զգացողությամբ։ Կարճ ասած՝ երբ իգական էակը պատրաստ ու մատչելի է բեղմնավորման համար, արական էակն «անցնում է գործի», այսինքն` արական սեռականությունն առաջընթաց, ներթափանցող է, մինչդեռ իգականը՝ սպասող, ընդունող: Արական սեռականությունը սերտ կապ ունի ագրեսիվության հետ, քանի որ ագրեսիվության շնորհիվ հնարավոր է դառնում հաղթել մյուս արուներին և արժանանալ էգի «բարյացակամությանը»: Արական էակն այստեղ դոմինանտ է, այն ունի իշխանություն հնազանդվող իգական էակի նկատմամբ:

Սեռերի զարգացման էվոլյուցիոն տեսության համաձայն իգական սեռի էակները ռեպրոդուկտիվ ցածր պոտենցիալի պատճառով (ամսվա մեջ ընդամենը մեկ ձվաբջիջ) պարտավոր են բծախնդիր լինել իրենց ընտրության հարցում: Դրա համար իգական էակը օժտված չէ բարձր գրգռվողականությամբ, ինչը կխանգարեր նրան դանդաղ ու համբերատար քննել, գնահատել ու «կշռադատված որոշում» ընդունել: Իգական սեքսուալությունն օրգազմի կարիք չունի, քանի որ այդպիսով նա շատ արագ կկորցներ իր սեռական հետաքրքրությունը: Իգական էակի էվոլյուցիոն ֆունկցիաներն են՝ հատկանիշների պահպանում, գենային զանազանության զտում կենսաբանական նպատակահարմարության մաղով, սերնդի քանակության ապահովում, տեսակի կայունության պահպանում:

Մարդու սեռական կյանքում հանդիպող սեքսուալության շատ դրսևորումներ, ինչպես նաև վարքային գործելակերպեր, կարելի է բացատրել վերոնշյալ կենսաբանական-էվոլյուցիոն նպատակահարմարությամբ, օրինակ` թե ինչո՞ւ է կինը դժվարությամբ գրգռվում, իսկ՝ տղամարդն արագ, ինչո՞ւ են կանայք ավելի հաճախ անօրգազմիայի, իսկ տղամարդիկ՝ վաղաժամ սերմնաժայթքման անհանգստություն ունենում, ինչո՞ւ են կանայք և տղամարդիկ տարբեր տիպի պոլիգամ (տղամարդիկ՝ ֆիզիկական-մարմնական, կանայք՝ հոգեհուզական) վարք դրսևորում։ Այս բոլորը կարելի է բացատրել սեռերի փոխհարաբերության հենց կենսաբանական-էվոլյուցիոն տեսակետից, եթե մարդուն չափենք կենսաբանական-կենդանաբանական օրենքներով։

Այո, սեռականության բնազդային օրենքներն ապահովում են սեռական վարքի անթերի կազմակերպված գործողություններ, որպիսիք միայն հիացմունք (մեղուների դեպքում), ինչու չէ նաև զվարճանք են (կապիկների պարագայում) առաջացնում։ Միայն թե կան մարդիկ, որոնց մոտ սեռական կյանքի դրսևորումները բոլորովին չեն համապատասխանում վերոնշյալ օրենքներին և այդ մարդկանց հիվանդ լինելու կատեգորիային չես կարող դասել, օրինակ՝ ամուսնուն հավատարիմ սպասող կնոջը կամ մատչելի կնոջից ազատ կամքով հրաժարվող տղամարդուն, փոխադարձ վիրավորանքներն ու խռովքներն իրար ներող և սեռական կյանք շարունակող զույգերը։ Այս տեսակ մարդկանց հիվանդ համարել և բուժել չես կարող, դա կհակասակի էթիկայի բոլոր կանոններին։ Բուժում առաջարկել մարդուն, ով հրաժարվում է պրիմատային սեքսուալություն դրսևորել, կնշանակի ինքդ պրիմատ դառնաս։ Մարդու սեքսուալությունը բոլորովին այլ իմաստներ է պարունակում, որոնք դեռ լիովին ուսումնասիրված չեն և չեն էլ լինի, քանի դեռ սեռագիտության մեջ հետազոտությունները հիմնվում են վիճակագրական տվյալների վրա, քանի դեռ նորմա հասկացության մեջ մարդկանց պատկերացնումներում գերիշխում են թվաբանական միջիններ և մեդիաններ։ Որպես բժիշկ, կհամարձակվեմ ասել, որ սեռական բազում խնդիրներ (Էրեկտիլ դիսֆունկցիա, կնոջ սեռական ցանկության բացակայություն, նախադռնային սերմնաժայթքում և այլ բազում սեքսոլոգիական գանգատներ), բուժման ենթակա խնդիրներ չեն (այն իմաստով, որով հասկանում է ժամանակակից գիտությունը), այլ մարդու էվոլյուցիան ապահովող նոր հնարավորություններ են, որոնք բավարար ուշադրության չեն արժանանում հենց այս՝ մարդու կայացման տեսանկյունից։

Փակել

© 2017 | ՆարինԷ Ներսիսյան | Բոլոր իրավունքները պաշտպանված են |

Besucherzahler
счетчик посещений