ՆԱՐԻՆԷ ՆԵՐՍԻՍՅԱՆ

Երկու հատվող բուրգերից ծնվում է Նորը

Tag: սեռական հաճույք

Անկեղծ զրույց` առողջ հարաբերություններ

Ինչո՞ւ մարդիկ չեն կարողանում առանց ամաչելու և անհարմար զգալու խոսել օրգազմի մասին: Ե’վ տղամարդիկ, ե’վ կանայք հաճախ դժվարությամբ են զրույց ծավալում սեռական հարաբերությունների, հատկապես, օրգազմի մասին: Միամիտ, անպարկեշտ կամ անհեթեթ երևալու վախը դրդում է, որ շատերն այս հարցում որդեգրեն պաշտպանողական մարտավարություն և նույնիսկ դիմեն այնպիսի ծայրահեղ անհեթեթ հնարքների` ինչպես հումորն ու սարկազմն են: Այս կերպ շատերը փորձում են շեղել, խուսափել կամ խեղաթյուրել առկա խնդրրը: Սեռական կարիքների, ցանկությունների ու մտահոգությունների շուրջ անհրաժեշտ քննարկման հանդեպ վախն ու խուսափողականությունը կարող է հիմնովին վնասել ու խաթարել մտերիմ ու ջերմ փոխհարաբերությունները: Երկարատև հարաբերությունների ընթացքում զույգերն անցնում են կյանքի տարբեր փուլեր և հաղթահարում տարատեսակ մարտահրավերներ` հղիություն, երեխայի ծնունդ, առողջության կորուստ, ծերացում և հենց այս պարագայում է, որ սեռական հարաբերությունների շուրջ անկեղծ քննարկումների ու զրույցների բացակայությունը կարող է ստեղծել այնպիսի մթնոլորտ, որը կհանգեցնի մտերմության խաթարման, օտարացման ու հարաբերությունների վատթարացման:

Թեև գոյություն չունի օրգազմի վերաբերյալ զրույց ծավալելու համար որևէ հստակ ու կատարյալ ձևաչափ, որը կարելի է առաջարկել զույգերին, բայց մի բան անառարկելի է` բացառապես անօգուտ է նմանատիպ զրույցներն ու քննարկումները սկսել քննադատությամբ կամ մեղադրանքով: Առավել նպատակահարմար է զրույցի մեկնարկը տալ հաճոյախոսությամբ, օրինակ` «Ինձ իսկապես շատ է դուր գալիս, երբ դու…» կամ «Ինձ համար հաճելի է, երբ դու…» կամ նմանատիպ այլ ոգևորող ձևակերպումներ: Փոխադարձ վստահության և հարգանքի շնորհիվ կարելի է հաղթահարել ամաչկոտությունը և ծավալել արդյունավետ քննարկում: Սեռական ցանկությունների, նախապատվությունների, համոզմունքների շուրջ զրույցն ու քննարկումը կարող են ջերմ և անկեղծ փոխհարաբերությունների ձևավորման կարևոր նախապայման դառնալ և ձևավորել այնպիսի մտերմություն, որով զույգերը կուզենան կիսվել հենց օրգազմի պահին:

Պետք է միշտ փայփայել ու սրտացավությամբ պահպանել առողջ սեռական հարաբերությունները: Սեքսը մեր ողջ կյանքի ընթացքում զբաղեցնում է կարճ ժամանակ, բայց այն շատ կարևոր ժամանակ է:

Կանանց սեռական գրգռման խանգարում

Մինչև վերջին ժամանակներս, կանանց սեռական գրգռանքի խանգարումները՝ իբրև ինքնուրույն խնդիր, մատնվել են բժիշկների և հետազոտողների լրիվ կամ մասնակի անուշադրության: Մինչդեռ համանման խնդիրը տղամարդկանց մոտ՝ էրեկտիլ դիսֆունկցիան, տասնամյակներ շարունակ եղել է հետազոտության և միջամտության առաջնային առարկա, և մինչ օրս էլ շարունակում է զբաղեցնել կենտրոնական բեմահարթակ: Սիլդենաֆիլի կիրառման համատարած հաջողությունն էր, որ առաջ բերեց կանանց սեռական գրգռանքի խանգարման ուսումնասիրման աճող հետաքրքրասիրություն այն հույսով, որ նմանատիպ դեղորայք էլ կգտնվի կանանց սեռականության վրա ազդող:

Թեև կանանց սեռական գրգռանքի խանգարման իրական տարածվածությունը հայտնի չէ, ընդունված է համարել, որ բոլոր տարիքային խմբերում զգալի թվով կանայք ունեն այս խնդիրը: 1994-ին ԱՄՆ-ում կատարված վիճակագրական տվյալների համաձայն 18-59 տարեկան կանանց 19%-ը ունի լյուբրիկացիայիի խանգարում: Ինչպես նշված է New England Journal of Medicine-ում, 1978-ին Frank, Anderson, and Rubinstein կողմից հետազոտվել են 100 «նորմալ» զույգեր և պարզվել է, որ 48%-ը նրանցից նշում են գրգռման բացակայություն, 33%-ը՝ գրգռանքը պահելու դժվարություն ու չնայած դրան նրանցից 86%-ը գոհ են իրենց սեռական կյանքից: Թվերի այս անհամապատասխանությունը խոսում է այն մասին, որ սեռական հարաբերության մեջ ընդգրկվելու համար կնոջը բավական է թեթև գրգռվել, ի տարբերություն տղամարդկանց մոտ էրեկցիայի ամբողջականության պարտադիր պահանջի: Այդ պատճառով այս հետազոտության ընթացքում ուսումնասիրված տղամարդկանց միայն 15% են գտնում, որ իրենց կանայք ունեն գրգռման խանգարում:

Հետդաշտանադադարային շրջանում հեշտոցի խոնավացման խանգարումները ավելի բարձր են, մի հետազոտության մեջ այդ ցուցանիշը հասնում էր 44%-ի:

Կարդալ ավելին

ԲՆՈՐՈՇՈՒՄԸ ԵՎ ՆԿԱՐԱԳՐՈՒԹՅՈՒՆԸ

Կանանց սեռական գրգռման խանգարումը վերաբերում է սեռական պատասխանի գրգռման փուլին: DSM-IV-ում սեռական գրգռման խանգարման ցուցանիշներն են՝

Ա) Ի պատասխան գրգռման՝ բավարար խոնավացման-ուռչեցման առաջացման կամ մինչև սեռական ակտիվության ավարտը այն պահելու մշտական կամ պարբերաբար կրկնվող անկարողություն:

Բ) Խանգարումը առաջ է բերում նշանակալի անհանգստություն կամ միջանձնային դժվարություններ:

Գ) Սեռական խանգարումը հետևանք չէ այլ հիմնական հիվանդության կամ որևէ նյութի անմիջական ֆիզիոլոգիական ազդեցության:

Այս ցուցանիշները ըստ էության համապատասխանում են Հիվանդությունների Միջազգային Դասակարգման 10-րդ վերանայման բնորոշմանը, ըստ որի այս կլինիկական միավորը կոչվում է կանանց գենիտալ ռեակցիայի բացակայություն և բնութագրվում է իբրև հեշտոցի չորություն կամ խոնավացման բացակայություն:

Ախտորոշիչ այս ցուցանիշներին համապատասխանող կանայք ունեն սեռական ցանկություն և հաճույք են ստանում սիրախաղից: Հաճախ նույնիսկ նրանք ի վիճակի են հեշտանք վերապրել, հատկապես եթե ուժգնորեն գրգռել նրանց վիբրատորի օգնությամբ: Այնուհանդերձ, նրանց հեշտոցը չոր է մնում գրգռման այնպիսի պայմաններում, որը բազմաթիվ այլ կանանց մոտ սովորաբար առաջացնում է հեշտոցի խոնավացում: Առնանդամի ներհրումը չոր և լարված հեշտոց ցավոտ է և տհաճ զգացողությունների տեղիք է տալիս: Սա կարող է երկրորդային խանգարումներ առաջացնել, ինչպիսիք են դիսպարեունիան և վագինիզմը, սեռական ցանկության կորուստը: Այս խանգարումով կանանց զուգընկերները հաճախ իրենց մերժված են զգում և տրտմում՝ համարելով իրենց վատ սիրեկաններ:

ԱԽՏՈՐՈՇՈՒՄԸ

Ինչպես և տղամարդկանց մոտ, կանանց գրգռանքի փուլը՝ խոնավացում-ուռչեցում հակազդումը, անմիջականորեն միջնորդավորված է վեգետատիվ նյարդային համակարգով և հատկապես նրա պարասիմպաթիկ մասով: Վերջին հաշվով, այս մեխանիզմը գտնվում է կեղևի հսկողության տակ և տեսականորեն ճիշտ է ենթադրել, որ կնոջ գրգռումը, համանման տղամարդկանց, պետք է զգայուն լինի հուզական ազդակներին: Սակայն իրականում պարզվում է, որ կանանց սեռական գրռգման խանգարման հոգեբանական ձևը տարածված չէ: Հայտնի փաստ է, որ ավելի մեծ հավանականություն կա, որ սեռական կոնֆլիկտ ունեցող կինը կորցնի իր սեռական ցանկությունը կամ ունենա հեշտանքի խանգարումներ, քան թե արգելակվի նրա սեռական գրգռման ընթացքը: Այն կանայք, որոնք ունեն նորմալ սեռական ցանկություն և կարող են հեշտությամբ հասնել հեշտանքի, բայց ի վիճակի չեն սեռական գրգռման, հիմնականում դաշտանադադարով կանայք են:

Կանանց սեռական ցիկլի արյունալցման փուլը շատ ավելի կայուն է զանազան հիվանդություններին և դեղորայքի ազդեցությանը, քան տղամարդկանց էրեկցիան, քանի որ այն ներառում է համեմատաբար պարզ անատոմիական կառույցներ և չի պահանջում հեմոդինամիկ բարձր ճնշման ապահովում սեռական օրգաններում: Կոնքի արյունամատակարարման ավելացումը, որը գրգռման փուլի մեխանիզմն է երկու սեռերի մոտ, կանանց հեշտոցում պարզապես առաջացնում է հեղուկի տրանսուդացիա լորձաթաղանթի անոթներից:

Միակ գործոնը, որ կարող է խոցելի դարձնել կանանց գրգռումը ֆիզիկական ազդակներին, հեշտոցի էստրոգենային բավարար հագեցվածությունն է, որն անհրաժեշտ պայման է հեշտոցի արյունալեցման ակտիվացման և խոնավացման: Էստրոգենային անբավարարության ժամանակ հեշտոցի լորձաթաղանթը և ներքո տեղակայված անոթային ցանցը ենթարկվում են ատրոֆիայի: Էստրոգենային անբավարարության հիմնական պատճառը դաշտանադադարն է, տարիքային բնականոն ընթացքով կամ ձվարանների վիրահատական հեռացման պատճառով: Թեև «ծերացած» ձվարանը և մակերիկամները դաշտանադադարից հետո շարունակում են արտադրել փոքր քանակությամբ էստրոգեններ, մեծամասն դեպքերում դա ի վիճակի չէ ապահովելու հեշտոցի բավարար խոնավացում: Այդ պատճառով, հետդաշտանադադարային կանայք, հատկապես եթե նրանք չեն ապրում կանոնավոր սեռական կյանքով, հակված են հեշտոցի չորության:

Էստրոգենային անբավարարությունը հեշտ է ախտորոշելը: Էսրտրոգենների բավարար մակարդակի խոսուն վկան է նորմալ դաշտանը: Բոլոր այցելուներին, որոնք ներկայացնում են հեշտոցի չորության գանգատներ, պետք է հարցնել դաշտանի կանոնավորության և բնույթի մասին: Բոլոր վերոնշյալ այցելուներին լրացուցիչ պետք է ենթարկել հեշտոցային քննության, որի ժամանակ հայտնաբերվում է չոր և գունատ հեշտոցային լորձաթաղանթ: Էստրոգենների ազդեցությունը վագինալ բջիջների վրա խիստ ցայտուն է և հատուկ եղանակով ներկված հեշտոցային քերուկի մանրադիտակային քննությունը արագ կերպով, թեև ոչ բարձ հավաստիությամբ, հաստատում է էստրոգենային անբավարարության փաստը: Ավելի հավաստի է ժամանակակից լաբորատոր պայմաններում էստրադիոլի մակարդակի որոշումը արյան պալազմայում:

ՏԱՐԲԵՐԱԿԻՉ ԱԽՏՈՐՈՇՈՒՄԸ

Հետազոտության ընթացքում պետք է ուշադիր լինել բոլոր այն հիվանդությունները բաց չթողնելու համար, որոնք կարող են նպաստել սեռական գրգռման խանգարմանը: Ստորև կքննարկվեն այն հիվանդագին վիճակները, որոնք կարող են ձգձգել գրգռման առաջացումը կամ ընդհանրապես կասեցնել այն: Պետք է սակայն նշել, որ այս վիճակները ինքնին լուրջ խնդիր են այցելուի համար և սեռական գրգռման խանգարումը այս դեպքերում առաջնային չէ:

Նյարդային համակարգի օրգանական խանգարումներ

Այն խանգարումներն են, որոնց ժամանակ վնասվում են ուղեղային սեռական կենտրոնները, դրանք են գլխուղեղի վնասվածքը և ցերեբրովասկուլյար խանգարումները: Այս դեպքերում գրգռման դժվարեցումը հետևանք է սեռական ուղեղային կենտրոնների, լիմբիկ համակարգի և ճակատային բլթի վնասման: Հիպոթալամուսի վնասումները և chraniopharingoma-ն բերում են նույնին՝ ճնշելով համապատասխան ուղեղային հատվածները, մինչդեռ հիպոֆիզի քրոմոֆոբ ադենոման գործում է ոչ միայն վերոնշյալ մեխանիկական մեխանիզմով, այլ նաև պրոլակտինի բարձր քանակության միջոցով: Փսիխոմոտոր էպիլեպսիան ձախողում է գրգռումը՝ խախտելով լիմբիկ համակարգի գործունեությունը:

Խանգարումներից ամենահաճախ հանդիպողը, որը վնասում է ստորև տեղակայված սեռական նյարդային կենտրոնները բազմակի սկլերոզն է (multiple sclerosis): Սրա ժամանակ հատվածաբար վնասվում է ողնուղեղը և դրա հետ միասին ողնուղեղում գտնվող, սեռական ռեֆլեքսների համար պատասխանատու կենտրոնները: Փաստորեն, սեռական դժվարությունները երբեմն բազմակի սկլերոզի առաջին դրսևորումներից են այնպիսի գանգատների տեսքով, ինչպիսիք են հեշտոցի խոնավացման անկարողությունը, ծլիկի իջած կամ բացակայող զգայունակությունը, դիսպարեունիան, որոնք բոլորն էլ բերում են գրգռանքի իջեցման: Այս ամենի հիմքում ընկած են ողնուղեղի դեմիելինիզացված հատվածները:

Կան այլ հիվանդություններ, որոնք ախտահարում են ողնուղեղը և կարող են առաջացնել գրգռանքի խանգարում, դրանք են tabes dorsalis, amyotrophic lateral sclerosis, syringomyelia, myelitis, ծայրահեղ թերսնուցումը և վիտամինային անբավարարությունը:

Ալկոհոլային նեյրոպաթիան և գոտկային դիսկի ճողվածքը բերում են գրգռման խանգարման՝ վնասելով սոմատիկ և վեգետատիվ նյարդաթելերը, որոնք կապակցում են սեռական ողնուղեային կենտորնները, այնպես ինչպես պատահում է Shay-Drager syndrome (առաջնային վեգետատիվ դեգեներացիա) ժամանակ:

Պարապլեգիան, որ հետևանք է ողնուղեղի տրավմատիկ վնասումների, կանխում է սեռական գրգռման առաջացումը, որովհետև արգելակված են նյարդային գրգիռների փոխանցման գործընթացները:

Անոթային խնդիրները բերում են գրգռման խափանման՝ կոնքի անոթային ցանցի թրոմբոտիկ վնասման և խցանումների հետևանքով: Սեռական ցիկլի գրգռանքի փուլը տուժված է կորոնար հիվանդության և արտահայտված հիպերտենզիայի դեպքում: Այս դեպքում, հավանաբար, դրա պատճառը առաջնահերթ հոգեբանական է՝ պայմանավորված դեպրեսիայով կամ հանկարծակի մահվան տագնապով: Հակահիպերտենզիվ դեղորայքները և հատկապես ալֆա-ադրենոբլոկատորները նույնպես կարող են նպաստել գրգռման արգելակումների:

Էնդոկրին և մետաբոլիկ խանգարումները ավելի շուտ ազդում են սեռական ցանկության և հեշտանքի փուլերի վրա, գրգռման խանգարումը երկրորդական է: Շաքարային դիաբետը կարող է առաջացնել գրգռման խանգարում ծլիկի զգայական նյարդերի նեյրոպաթիայի հետևանքով: Տեստոստերոնային անբավարարությունը բերում է լյուբրիկացիայի խանգարման և խափանում ուղեղային կենտրոնների գործունեությունը, քանի որ վերջիններս աշխատանքային նորմալ ընթացքը պահանջում է բավարար տեստոստերոնային հագեցվածություն: Վահանագեղձի հորմոնների անբավարարությունը նույնպես առաջացնում է գրգռանքի խանգարում դեռևս չբացահայտված մեխանիզմներով: Այլ էնդոկրին հիվանդություններ, ինչպիսիք են Ադիսոնյան հիվանդությունը, Կուշինգի համախտանիշը, ակրոմեգալիան և հիպոպիտուիտարիզմը, կարող են առաջացնել գրգռանքի խանգարումներ, քանի որ առաջացնում են հորմոնալ դիսբալանս, որն ազդում է ուղեղի սեռական նյարդահոսքերի նորմալ ընթացքի և սեռական օրգանների գործունեության վրա:

Հիվանդությունների շարքում, որոնք բերում են գրգռանքի խանգարումների, կանգնած են լյարդի հիվանդությւոնները, քանի որ խանգարվում է էստրոգենային փոխանակությունը և երիկամի հիվանդությունները:

Փոքր թվով կանանց մոտ, որոնք ունեն նորմալ դաշտանային ֆունկցիա հեշտոցային չորությունը պայմանավորված է հոգեբանական արգելակումով: Որոշ դեպքերում պատճառը վախն է սեռական հարաբերությունից կամ անբավարար նախերգանքային սիրախաղը: Սակայն կլինիկական փորձը ցույց է տալիս, որ այս պատճառների դերը գրգռանքի խանգարումներում նշանակալից չէ և դեռևս սրանց անմիջական հոգեբանական նախատրամադրող պատճառները լրիվ ուսումնասիրված չեն:

Անհրաժեշտ է նմանապես պարզել արդյոք սեռական ախտանշանները առաջնային են, թե հետևանք են որևէ հոգեբուժական հիվանդության, ինչպիսին են տրամադրության (աֆեկտիվ) և տագնապային խանգարումները: Մի քանի բացահայտիչ հարցերի օգնությամբ կարելի է պարզել հոգեբուժական խնդրի առկա լինելու փաստը. երբևիցե այցելուի կյանքում տեղ ունեցե՞լ է որևէ նյութի չարաշահում կամ հոգեկան հիվանդություն կամ նա ստացե՞լ է հոգեմետ դեղորայք, ենթարկվել հոգեբուժական հոսպիտալացման, ունեցե՞լ է դեպրեսիա, ֆոբիաներ, խուճապի գրոհներ:

Եթե հոգեբուժական ծանրաբեռնվածությունը առկա է, պետք է պարզել ո՞րն է առաջնային՝ սեռական ախտանիշը թե՞ հոգեկան հիվանդությունը: Հարկավոր է ճշտել, արդյոք որևէ դեղորայքի կողմնակի ազդեցության հետևանք չէ սեռական ախտանիշը: Կարևոր է հարցնել սուիցիդալ փորձերի մասին: Արտահայտված հոգեկան հիվանդությամբ այցելուն կարող է շատ խոցելի գտնվել և չդիմակայել հոգեսեռական բուժմանը կամ պարզապես օգուտ չստանալ դրանից:

ՊԱՏՃԱՌԱԳԻՏՈՒԹՅՈՒՆԸ

Կանանց սեռական ցիկլի գրգռանքի փուլը ընթանում է սեռական օրգանների անոթալայնացման ռեֆլեքսի ուղեկցությամբ: Վերջինս բերում է հեշտոցամուտքի հյուսվածքների ուռչեցման, փխրունացման, որն արտահայտվում է հեշտոցի լորձաթաղանթի կարմիր գունավորման և անոթներից արյան պլազմայի արտահոսով պայմանավորված թացության կամ խոնավության ձևով: Զարկերակների լայնացումը պայմանավորնած է ողնուղեղի երկու կենտրոնների ակտիվացմամբ՝ S2, S3, S4-ում, և մյուսը՝ T11, L1, L2-ում. Նմանատիպ տղամարդկանց, կանանց սեռական գրգռումը կարող է ուժեղանալ կամ թուլանալ գլխուղեղից եկող նյարդային գրգիռների ազդեցության տակ, որոնք իրենց հերթին ենթակա են անցյալի վերապրումներին և փորձառությանը:

Հեշտոցի խոնավացման հիմնական դերը պատկանում է էստրոգենին: Հայտնի է վերջինիս ֆիզիոլոգիական ցիկլիկ ազդեցությունը արգանդի վզիկի գեղձերի գործունեության վրա: Ինչպես հայտնի է, ձվազատման շրջանում՝ դաշտանային ցիկլի մեջտեղում, այդ գեղձերի ակտիվությունը բարձրանում է և բերում վզիկի լորձային խցանի ջրիկացմանը, իսկ հետձվազատումային շրջանում գեղձերի իջնող ակտիվությունը, որը համընկնում է պրոգեստերոնի (հակաէստրոգեն) աճի և էստրոգենների նվազման հետ, ուղեկցվում է լորձային խցանի մածուցիկության բարձրացմամբ:

Էստրոգենները ունեն նաև ուղղակի ազդեցություն հեշտոցի խոնավացման վրա, քանի որ հարստացնում են ենթաէպիթելային անոթային հենքը, որը բարելավում է լյուբրիկացիան: Էստրոգենների այս ազդեցությունը հեշտոցի լորձաթաղանթի վրա կախված չէ ձվազատումից և շարունակական է այնքան ժամանակ, քանի դեռ ձվարանները արտադրում են բավարար քանակությամբ էստրոգեններ: Թեև այս հորմոնների արտադրությունը նվազում և ի վերջո լրիվ ընդհատվում է դաշտանադադարից հետո, էսրտոգենային հագեցվածությունը կարող է էական լինել նաև այս ժամանակաշրջանում շնորհիվ մակերիկամներում արտադրվող անդրոստենդիոնի փոխարկման՝ էստրոնի և ավելի պակաս նշանակալիությամբ՝ տեստոստերոնի փոխարկմամբ՝ էստրադիոլի: Այնուհանդերձ, տարիքի հետ մակերիկամների այս օժանդակ օգնությունը նույնպես դառնում է անբավարար՝ սեռական օրգանների՝ հեշտոցի լորձաթաղանթի և հարակից օրգանների հյուսվածքները ֆունկցիոնալ պատրաստակամության վիճակում պահելու համար:

Այսպիսով, ըստ էության, սեռական ցիկլի գրգռանքի փուլի խանգարումները կանանց մոտ հետևանք են գլխավորապես անոթալայնացման խանգարման՝ ի հետևանք էստրոգենների արտադրության իջեցման կամ արգելակման: Պետք է նշել, որ նաշադաշտանադադարային կանանց մոտ նման խանգարումը հազվադեպ հանդիպող է:

Էստրոգենային անբավարարություն

Էստրոգենային անբավարարությունը բնորոշ է հետևյալ վիճակներին:

Ատրոֆիկ վուլվովագինիտ- Սա գրգռանքի խանգարում առաջացնող ամենահաճախ հանդիպող գինեկոլոգիական պատճառն է, որ հանդիպում է հետդաշտանադադարային կանանց մոտ: Գինեկոլոգիական քննությունը հայտնաբերում է, որ լորձաթաղանթը չոր է և հաճախ կարմրած: Կարող է դիտվել մկանային լարվածության իջեցում և էլաստիկության պակաս: Հեշտոցի լորձաթաղանթը բարակած է, երբեմն այն աստիճանի, որ հպումից արյունահոսում է: Լաբորատոր հետազոտության ժամանակ հեշտոցի թաց քերուկում հայտնաբերվում են հիմնականում պարաբազալ բջիջներ: Արյան պլազմայում իջած է էստրոգենի մակարդակը, այն դեպքում, երբ ՖԽՀ-ի և ԼՀ-ի մակարդակները սովորաբար բարձր են:

Բացի էստրոգենային անբավարարության ֆիզիոլոգիական պատճառներից կան նաև այլ վիճակներ, որոնք բերում են ատրոֆիկ վուլվովագինիտի: Դրանք են՝

գ Ձվարանի հեռացումը, հատկապես երիտասարդ կանանց մոտ, ում ձվարանները դեռևս ի վիճակի են արտադրել բավարար քանակությամբ էստրոգեններ (վիրահատական դաշտանադադար)

գ Ռադիկալ կոնքային վիրահատությունը (օրինակ արգանդի վզիկի քաղցկեղի ժամանակ), քանի որ այս դեպքում նույնպես հեռացվում են ձվարանները՝ էստրոգենների հիմնական աղբյուրը և բացի այդ վնասվում են սիմպաթիկ և պարասիմպաթիկ նյարդային ուղիները:

Երբեմն հեշտոցային չորությունը հետևանք է պրոգեստերոնային նյութերի, օրինակ՝ մեդրոքսիպրոգեստերոնի ազդեցության, որն ազդում է և իբրև հակաէստրոգեն, և իբրև հակաանդրոգեն: Այս մեխանիզմով ազդում են որոշ հակաբեղմնավորիչներ, որոնք պարունակում են պրոգեստերոնի բարձր քանակներ: Այս դեպքերում գինեկոլոգիական հետազոտությունը հայտնաբերում է հեշտոցի նշանակալի չորություն, բայց ոչ լորձաթաղանթի բարակություն կամ պետեխիալ բծեր, ինչպես բնորոշ է ատրոֆիկ վիճակներին: Հեշտոցային քերուկում գերակշռում են միջանկյալ բջիջները առավել, քան cornified և պարաբազալ բջիջներջ:

ԳՐԳՌԱՆՔԻ ԽԱՆԳԱՐՈՒՄՆԵՐԻ ԲՈՒԺՈՒՄԸ

Կանանց գրգռանքի խանգարումների բուժումը իրականացվում է այցելուի հետ առանձին կամ զուգընկերոջ հետ միասին, կամ երկու տարբերակով համատեղ: Կիրառվում է դեղորայքային բուժում և սեքս-թերապիա, զուգակցված կամ առանձին առանձին: Դեղորայքային բուժումը հազվադեպ է ցուցված նախադաշտանադադարային փուլում գտնվող կանանց համար: Դաշտանադադարից հետո բուժման հիմնական մեթոդը փոխարինող դեղորայքային թերապիան է, առանց սեքս թերապիայի օժանդակության: Եթե նմանատիպ դեպքերում դեղորայքային բուժումը անբավարար է, այն զուգակցվում է գրգռանքի բուժման սեքս-թերապիայի մեթոդներով, իբրև օժանդակ հավելում բուժման հիմնական դեղորայքային կամ այլ եղանակին:

Գրգռանքի հոգեբանական խանգարման դեպքում կիրառվում է սեքս-թերապիայի կոգնիտիվ-վարքային միջոցների շարքը: Սրանք զուգակցվում են փսիխոդինամիկ ուղղվածությամբ փսիխոթերապիայի հետ, եթե բուժման նկատմամբ կայուն, խորը հուզական խնդիրներ են ի հայտ գալիս:

Էլեկտրական կամ մարտկոցով աշխատող վիբրատորները շատ արդյունավետ են կանաց սեռական ցանկությունը, սեռական գրգռանքը և հեշտանքը բարձրացնելու համար: Արտահայտված գրգռումը, որն առաջանում է վիբրատորի օգնությամբ, նպաստում է հոգեբանական արգելակումների և բժշկական վիճակներով պայմանավորված գրգռանքի խանգարումների հաղթահարման համար: Վիբրատորի կիրառումը նախատեսվում է բուժական համալիրի կազմում և կիրառվում է ինչպես անհատական, այնպես էլ զուգընկերոջ հետ միասին:

Եվ վերջապես, բուժական ազդեցություն ունի լյուբրիկանտների կիրառումը, որը արդյունավետ է ոչ միայն դաշտանադադարով, այլև էստրոգենների նորմալ մակարդակով կանանց համար: Վերջերս բարելավված նոր ջրային լյուբրիկանտները ավելի փափուկ են և երկարատև ազդող: Դրանք գերադասելի են յուղային լյուբրիկանտներին, քանի որ քիչ հավանականությամբ են վնասում լատեքսից պահպանակները: Սիլիկոնային լյուբրիկանտները գերադասելի են, եթե սեռական հարաբերությունը ընթանում է ջրում կամ երբ այն խիստ բուռն ընթացք ունի, սակայն դրանք թանկ արժեն: Թեև լյուբրիկանտները ընդհանուր առմամբ անվանաս են, բայց նրանք պարունակում են հակավիրուսային սպերմիցիդ նոնօքսինոլ 9, որը կարող է գրգռել որոշ այցելուների: Ամեն դեպքում, ինչքան քիչ կիրառվեն լրացուցիչ հավելանյութեր, այնքան պակաս կլինի ալերգիկ ռեակցիայի հավանականությունը:

Փակել

Հաճույք և սեռական գրգռում

Այլասերված հաճույք

1. Բարև ձեզ ես ու ամուսինս գրեթե 15 տարի միասին ենք, մեր սեռական կյանքում ամեն ինչ գերազանց է, բայց արդեն մեկ տարի է ինչ ամուսինս ինձ համոզում է սեքս անել մի երրորդ տղայի հետ, իսկ ինքը մեզ նայի հետո միանա մեզ: Ես կտրականապես դեմ եմ, մեր վեճերը դարձել են ամենօրյա: Խնդրում եմ ասեք՝ ինչպե՞ս նրան ետ կանգնեցնեմ այդ մտքից, կամ ինչու՞ է նա այդպես ուզում: Ի՞նչ կարող եք ասել: Ըստ ամուսնուս՝ դա իրեն գերագույն հաճույք կտա և նա երազում է դրա մասին:

Պատասխան

Այն, ինչ ցանկանում է Ձեր ամուսինը սեռական այլասերվածություն է, բժշկական լեզվով դրան անվանում են պերվերզիվ վարք: Դա հոգեկան առողջության խնդիր է, Ձեր ամուսինը բուժման կարիք ունի, Դուք նրան օգնել չեք կարող, նրան կարող է օգնել միայն մասնագետը, այն էլ երկարատև թերապիայի շնորհիվ: Պատճառները տարբեր են, չի բացառվում նաև գլխուղեղի օրգանական խնդրի առկայությունը, ուստի խորհուրդ է տրվում անպայման դիմել մասնագետի՝ համապատասխան հետազոտման և բուժման համար:

Փակել

Գրգռման դժվարություն

1. Հարգելի բժիշկ, ի՞նչ կարող եմ անել, որ սեռական հարաբերությունների ժամանակ ամուսինս ավելի երկար զբաղվի սիրախաղով, նա միշտ շտապում է անցնել բուն գործողությանը։ Ես հոգնել եմ ամեն անգամ նրան հիշեցնել, որ կանայք դրա կարիքը շատ ունեն։ Մի՞թե դա պարզապես էգոիստություն է նրա կողմից։ Կանխավ շնորհակալություն։

Պատասխան

Դուք ինքներդ կարող եք սիրախաղի հեղինակը լինել և չսպասել, որ նա իր վրա վերցնի այդ պատասխանատվությունը: Մյուս կողմից սիրախաղի նշանակությունը ամուսնական հարաբերությունների զարգացման հետ գնալով պակասում է, տևողությունը` կարճանում: Դա կապված է այն բանի հետ, որ զույգը սովորում է միմյանց արագ և արդյունավետ գրգռելու ձևերը: Եվ վերջապես սիրախաղի տևողությունը ինչքան էլ երկար լինի, կինը միևնույնն է չի գրգռվի, եթե նա գրգռման խանգարում ունի: Կինը պետք է հստակ իմանա, ինչը և ինչպես կարող է գրգռել իրեն, որպեսզի «հույսը չդնի» տղամարդու նախաձեռնության վրա, այլ ապավինի «սեփական ուժերին»: Հավանաբար ձեզ մոտ կա գրգռման դժվարության խնդիր, որը ամենևին ամուսնու անկողնային վարքի հետ չի կապված, այլ Ձեր ներքին խնդիրն է կամ ձեր հարաբերության մեջ տեղ գտած ինչ-որ կոնֆլիկտի հետևանք է։

Փակել

2. Բարև Ձեզ, ես 20 տարեկան եմ, 6 ամիս է ինչ ապրում եմ սեռական կյանքով: Սեքսով զբաղվում եմ 2 շաբաթը մեկ անգամ և ամեն առաջին անգամից հետո ցավ եմ զգում: Երբ ընկերս առնանդամը մտցնում է հեշտոցիս մեջ, ես ցավից սկսում եմ դողալ, իսկ երկրորդ անգամը արդեն հաճույք եմ ստանում և այսպես ամեն անգամ: Կարող եք ասել՝ ինչի՞ց դա կարող է լինել:

Պատասխան

Կարծում եմ ցավի առկայությունը սեռական մերձեցման առաջին փորձի ժամանակ կապ ունի այն հանգամանքի հետ, որ բավական ուշ ուշ եք ապրում սեռական կյանքով: Այս ենթադրության օգտին խոսում է այն, որ երկրորդ ակտի ժամանակ ցավը բացակայում է, նույնսիկ հաճույք եք ապրում: Խորհուրդ կտամ երկարեցնել սիրախաղի ժամանակահատվածը, որի ընթացքում մարմինը կհասցնի նախապատրաստվել առնանդամի ներս ընդունմանը: Հարկավոր է, որ հեշտոցը բավականաչափ խոնավ լինի և ներքին սուբյեկտիվ գրգռման զգացողություն ապրեք նախքան ներհրումը, որպեսզի ցավի զգացողություն չլինի:

Փակել

Գրգռման հեղուկներ

1. Բարև Ձեզ: Մի հարց ունեմ. ես նոր եմ ամուսնացել ու սեքսի ժամանակ տեսնում եմ հեղուկի առկայություն և համարյա թե ոչինչ չեմ զգում, ամուսնուս հետ փորձել եմ տարբեր դիրքերով, բայց փոփոխություն չեմ նկատում: Գուցե հետագայում երեխա չունենալու խնդիրներ լինի: Ի՞նչ խորհուրդ կտաք, ինչու՞ է այդպես: Նախապես շնորհակալություն:

Պատասխան

Նախ սկսեմ հեղուկի առկայությունից։ Սեռական գրգռման ժամանակ սեռուղիներից, այսինքն՝ հեշտոցից, կնոջ մոտ և առնանդամի գլխիկից՝ տղամարդու, բնականոն ձևով արտազատվում են որոշակի քանակությամբ հեղուկներ: Դրանք հավելյալ գեղձերի գործունեության արդյունքն են, որի կենսաբանական նպատակը ներհրման գործընթացի հեշտացումն է: Բացի այս հեղուկից, կնոջ մոտ հեշտոցային գրգռման ժամանակ արտազատվում է նաև այլ հեղուկ, որը հեշտոցի ներքին պատերից արտամղվող հեղուկ է, դա հեշտոցի ներքին թաղանթի՝ լորձաթաղանթի արյունատար անոթներից արյան մեծ ճնշման շնորհիվ արտամղվող արյան պլազման է, այս հեղուկի նպատակը հեշտոցային խողովակի խոնավեցումն է, ինչը հեշտացնում և անցավ է դարձնում սեռական հարաբերության ընթացքը: Այլ տեսակի հեղուկներ ևս կան, որոնք արտազատվում են կնոջ մոտ օրգազմի ժամանակ, սակայն ձեր դեպքում խոսքը դրանց մասին չէ, քանի որ սեքսի ժամանակ ոչինչ չզգացող կնոջ մոտ այս հեղուկները ընդհանրապես չեն կարող արտազատվել: Ձեր անզգայության խնդիրը տարբեր պատճառներից կարող է լինել, որը հետազոտման կարիք ունի: Հղիանալու հետ կապված անհանգստանալու կարիք չկա, քանի որ հաճույքի և օրգազմի առկայությունը բոլորովին պարտադիր չեն կնոջ բեղմնավորման համար:

Փակել

Էրոգեն գոտիներ

1. Բարև Ձեզ հարգելի Նարինե: Ուրախ կլինեմ, եթե կարողանաք օգնել ինձ իմանալու հարցերիս պատասխանները: Արդյո՞ք հնարավոր է կնոջ էրոգեն գոտիները կորցնեն իրենց էրոգեն լինելը: Ես ունեմ ընկեր և ամենասկզբում նրա շոյանքներից գրգռվում էի, հատկապես հատուկ էրոգեն գոտիների դիպչելիս, ժամանակի ընթացքում ես զգում եմ մի տեսակ սովորական է դառնում, մի տեսակ էլ չեմ կարողանում նախկինի պես հաճույք ստանալ… ու վախ է առաջացել, մտածում եմ՝ հնարավոր է ժամանակի ընթացքում էլ ընդհանրապես հաճույք չզգամ, կամ դա ինչի՞ հետ կարող է կապված լինել:

Պատասխան

Կան մի շարք հիվանդություններ, որոնց դեպքում մենք նկատում ենք սեռազգայունության կորուստ, օր.՝ շաքարային դիաբետ, նյարդային համակարգի դեգեներատիվ հիվանդություններ, ցրված սկլերոզ, անոթային սնուցման խնդիրներ, տարբեր աուտոիմուն հիվանդություններ և այլն։ Սակայն կնոջ էրոգեն գոտիների առանձնահատկությունը կայանում է նրանում, որ իրենց զգայունությունը պայմանավորված է ոչ այնքան էրոգեն գոտու անատոմիական-ֆիզիոլոգիական կարգավիճակով, այլ այն տրամադրությամբ, որով կինը դիտարկում է տվյալ տղամարդուն: Եթե նա մեծ ուժով ցանկանում է այդ տղամարդուն, ապա էրոգեն գոտիների զգայունությունը շատ բարձր է, իսկ եթե դա սովորական և կանխատեսելի դարձած տղամարդ է, ապա հնարավոր է, որ էրոգեն գոտիներն ընդհանրապես չարձագանքեն: Վերարտադրողական բնազդը մեր մեջ այնպես է դրված, որ մեզ անընդհատ հետաքրքիր լինեն նոր գենային համադրումներ, ուստի և միևնույն սեռական զուգընկերը ֆիզիոլիգիական տեսանկյունից ճանաչվում է ոչ նպատակահարմար բեղմնավորման համար, իսկ եթե կան նաև թաքնված վիրավորանքի, խռովքի կամ ցանկացած այլ բացասական զգացմունքներ, ապա ոչ միայն ֆիզիոլոգիական տեսանկյունից, այլ նաև հոգե-հուզական տեսանկյունից զուգընկերը դառնում է ոչ ցանկալի։ Մյուս կողմից նյարդային ֆիզիոլոգիայի օրենքն է, կորցնել դրդվելիության ռեակցիան միևնույն գրգռի նկատմամբ պաշտպանական նկատառումներով։ Այդ իսկ պատճառով, եթե մենք միայն սպառում ենք հարաբերությունը և չունենք ստեղծագործական ներդրում ինքներս մեր և հարաբերության մեջ, ապա էրոգեն գոտիների զգայունակությունն աստիճանաբար մարում է։

Փակել

Ծննդաբերություն և հաճույք

1. Ես ունեմ 1 երեխա ու ինձ թվում է, թե ծննդաբերությունից հետո ես կապրեմ այդ հաճույքը, կզգամ, բայց սխալվեցի: Հնարավո՞ր է արդյոք հղիանամ ու երկրորդ ծննդաբերությունից հետո զգամ սեռական հաճույք: Շնորհակալություն:

Պատասխան

Իսկապես, շատ կանայք սեռազգայուն են դառնում ծննդաբերությունից հետո: Հղիությունը այնպիսի շրջան է, երբ կնոջ օրգանիզմում մի քանի անգամ ավելանում է սեռային հորմոնների մակարդակը, իսկ սեռազգայուն գոտիների արթնացման համար հորմոնները մեծ դեր են խաղում: Սակայն կնոջ սեքսուալության կայացումը միայն հորմոններով չի պայմանավորված, այստեղ մեծ դեր են խաղում կնոջ ներքին ապրումների բնույթը և հարաբերությունը ամուսնու հետ, որոնք կարող են կասեցնել սեռական հասունացումը և կնոջ կայացումը իբրև կին: Հնարավոր է, որ երկրորդ հղիությունը արթնացնի Ձեր մեջ սեքսուալ ապրումներ, եթե Դուք կարողանաք միջանձնային հարաբերություններում հաղթահարել Ձեր անձի ներսում արդեն արմատավորված այնպիսի հոգեվիճակներ, որոնք հաճախ պատճառ են դառնում սեռական հաճույքի բացակայության, քանի որ հանգցնում են սեռական գրգռման կրակը: Նշեմ մի քանիսը՝ ամոթ, մեղքի զգացում, զզվանք, կաշկանդվածություն, խռովք, հիասթափություն, բարկություն, հուսահատություն, անհամբերություն և մի շարք այլ նմանատիպ հոգեվիճակներ։ Հաճախ կանայք ենթագիտակցորեն պաշտպանվում են իրենց սեռական կարիքներից և պահանջմունքներից, քանի որ դրանք իրենց հոգեկանի խորքային շերտերում կապակցված են անթույլատրելիության, վտանգի և պատժի հետ: Սեռական սառնության խնդիրը բարդ և բազմակողմանի խնդիր է, որի լուծումը մասնագիտական օգնության կարիք ունի:

Փակել

Հաճույք տարօրինակ ձևով

1. Բարև Ձեզ, հարգելի բժիշկ: Խնդրում եմ պատասխանեք, ես հաճախ եմ հաճելի զգացողություններ ունենում, երբ պահում եմ կղանքս: Ինչի՞ հետ կարող է այն կապված լինել և արդյո՞ք կարող է այն ինչ որ բացասական ազդեցություն ունենալ:

Պատասխան

Անատոմիական կառուցվածքն այնպիսին է, որ հետանցքի շուրջը կա զգայուն հյուսվածք, ինչն էլ կոշտ մակերեսի հետ շփումից ակտիվանում է՝ հարուցելով հաճելի զգացողություններ, դա է պատճառը, որ մեծ թիվ կանայք էրոտիկ գրգռման զգացողություն են ապրում անալային հարաբերության ժամանակ: Սակայն երկար պահել կղանքը խորհուրդ չի տրվում, քանի որ ուղիղ աղում ջրի հետներծծման հետևանքով կղանքային զանգվածը կարող է այն աստիճանի պնդանալ, որ դուրս գալուց վնասի ուղիղ աղու լորձաթաղանթը՝ բերելով ճաքերի առաջացման:

Փակել

Հաճույքի բացակայություն

1. Բարև Ձեզ: Ես 22 տարեկան եմ, սեռական կյանքով արդեն ապրում եմ 3 ամիս, սակայն հաճույք չեմ զգում: Կարելի է ասել ոչինչ չեմ զգում: Իմ ընկերը շատ սիրառատ է և կարողանում է ինձ գռգռել, սակայն հենց սկսվում են սեռական հարաբերությունները ես չեմ զգում ոչինչ: Ասեմ, որ ընկերս 28 տարեկան է, նրա մոտ խնդիրներ կարծես չկան: Նա իմ առաջին տղամարդն է: Ես զարմացա, երբ նույնիսկ մեր առաջին հարաբերության ժամանակ ես ոչինչ չզգացի, ոչ ցավ, ոչ հաճույք, չեմ խոսում արյան հետքերի մասին, որոնք բացակայում էին: Ես ասել եմ իմ ընկերոջը, որ ոչինչ չեմ զգում: Մենք նույնիսկ մի քանի անգամ փորձել ենք մոտ 40 րոպե և ես ոչինչ չեի զգում…. Նա այդ ժամանակ ինձ սկսեց շոյել ձեռքով և ես օրգազմ ապրեցի…. Հիմա մոլորության մեջ ենք, հնարավո՞ր է արդյոք դա կապված լինի առնանդամի չափսից, թե՞ խնդիրը ամեն դեպքում իմ մեջ է:

Պատասխան

Հաճույքի զգացման բացակայությունը հեշտոցային հարաբերման ժամանակ, հեշտոցային անզգայության նշան է։ Սա մի խնդիր է, որը կապված է կնոջ հոգեսեռական զարգացման հետ, հիմնականում հանդիպում է ոչ բավարար սեռահասուն կանանց մոտ։ Ֆիզիկապես հասուն լինելը դեռևս չի նշանակում կին լինել, դրա համար պետք է ոչ միայն մարմնի, այլ նաև մտքի հասունություն, որի պարագայում միայն հնարավոր է անհրաժեշտ հոգեհուզական ապրումները կապակցել մարմնի հետ։ Կնոջ էրոգեն զգայունությունը արթնանում է այն ժամանակ, երբ գրգռման հույզը մարմնավորվում է։ Պետք չէ տխրել և հուսահատվել այս խնդրի պատճառով, պարզապես անհրաժեշտ է այցելել կլինիկա և ստանալ համապատասխան բուժում: Ասեմ, որ առնանդամի չափը այստեղ բոլորովին կապ չունի, ինչպես նաև այդքան էական չէ սեռական ակտի տևողությունը, սրանք երկու տարբեր մոլորություններ են, որոնք տղամարդկանց սեռական թերարժեքության բարդույթից են բխում: Նաև կնոջ օրգազմի հետապնդումը տղամարդու կողմից, նունպես գործին խանգարում է։

Փակել

2. Բարև ձեզ, հարգելի բժիշկ, ես 23 տարեկան եմ, արդեն 1 տարի է ինչ ամուսնացած եմ և առաջին իսկ հարաբերության ժամանակից սկսած ես ոչինչ չեմ զգում, շուտ եմ գրգռվում ցանկություն ունեմ, իմ ամուսնուն էլ շատ եմ սիրում, բայց հարաբերության ժամանակ ոչինչ չեմ զգում: Շատ եմ խնդրում օգնեք, ասացեք՝ իմ հետ ինչը այն չի:

Պատասխան

Իհարկե հնարավոր չէ հակիրճ ներկայացնել թե ինչու դուք ոչինչ չեք զգում, ամեն դեպքում փորձեմ բացատրել- սեռական հարաբերության ժամանակ ոչինչ չզգալը խոսում է նրա մասին, որ դուք հոգեէմոցիոնալ բնույթի խնդիր ունեք կապված սեռական ցանկության հասունացման հետ, այսինքն` Ձեր սեռական զարգացման ժամանակ, Ձեր գիտակցության մեջ արմատավորվել են այնպիսի պատկերացումներ և համոզումներ, որոնք ներքին կոնֆլիկտ են ստեղծել սեռական զգացողությունների արթնացման հետ: Օրինակ, հաճախ նման անզգայություն լինում է, երբ արմատավորված համոզում կա, որ սեռական հաճույքը մեղք է, հարիր չէ բարոյական աղջիկներին, ամոթ է կամ վտանգավոր է և կարող է տանել կործանման: Կան նաև մի քանի հիվանդություններ և ախտաբանական վիճակներ, որոնց պատճառով կարող է խախտված լինել զգացողական նյարդերի գործունեությունը, այս ամենը պետք է հետազոտել և բացառել: Մեծ նշանակություն ունի նաև Ձեր ամուսնական հարաբերությունների բնույթը, հայտնի փաստ է, որ կուտակված վիրավորանքը և հիշաչարության զգացումը կործանարար են ազդում սեռական հաճույքի և գրգռման կարողության վրա: Շատ կարևոր է միջանձնային փոխհարաբերություններում ձեր անձի էմոցիոնալ ինքնադրսևորման և ինքնատիրապետման կարողությունը: Միանշանակ խորհուրդ կտամ դիմել սեքսոլոգիայի կլինիկա, խնդրին լուծում տալու և հետագա ավելի լուրջ բարդություններից խուսափելու համար:

Փակել

3. Բարև Ձեզ: Ինձ շատ է անհանգստացնում մի հարց: Ես արդեն մոտ 4 ամիս է ամուսնացած եմ և համարյա ոչ մի անգամ հաճույք չեմ ստացել հարաբերությունից: Նախ ամուսինս շուտ է վերջացնում 3-ից 5 րոպե, կարող է ավելի շատ, փորձել ենք մի քանի անգամ իրար հետևից հարաբերություն ունենալ, բայց էլի բավարարված չեմ լինում: Ինքնաբավարարմամբ շատ արագ և շուտ վերջացնում եմ, անգամ դա եմ փորձել, ավելի շատ հաճույք եմ ստանում այդպես քան նորմալ հարաբերությունից: Այս ամենն ինչ-որ կապ ունի՞ ամուսնուս շուտ վերջացնելու հետ:

Պատասխան

Նախ ասեմ, որ 3-5 րոպեն շուտ վերջացնել չի համարվում: Շուտ է համարվում այն դեպքում, երբ ներհրման պահից մինչև սերմնաժայթքման պահը ընկած ժամանակահատվածը 1 րոպեից պակաս է: Իսկ մի քանի անգամ իրար հետևից սեռական գործողություն անելը և ոչինչ չզգալը վկայում է այն մասին, որ խնդիրն այստեղ ոչ թե ամուսնու, այլ հենց ձեր մեջ է, հատկապես, որ նշում եք, թե ինքնաբավարարման ժամանակ օրգազմի խնդիր չեք ունենում: Մեր լեզվով ասած, դուք ունեք մասնակի օրգազմի խանգարում, որը բերում է սեքսոլոգիական աններդաշնակության: Այս խնդրի պատճառները տարբեր են լինում և որպեսզի պարզվի, թե որն է կոնկրետ պատճառը ձեր դեքպքում, Դուք սեքսոլոգիական հետազոտման կարիք ունեք: Այդ հետազոտությունը մանրակրկիտ զրույց է, ուղղված Ձեր սեռական զգացողություններին և կյանքին, ինչպես նաև որոշ դեպքերում պահանջվում են հորմոնալ և նյարդաբանական քննություններ: Հիմնականում, այս խնդրի ամենատարածված պատճառներից մեկը միջանձնային հարաբերություններն են, որոնք տվյալ դեպքում թույլ չեն տալիս ինտիմ մոտիկության ժամանակ լրիվ թուլանալ և տրվել հաճելի զգացողություններին: Երբեմն էլ խնդիրը հենց ձեր անձի ներսում է, այսինքն ձեր ունեցած սխալ պատկերացումների, արգելակող հոգեսեռական բարդույթների հետևանք:

Փակել

4. Հարգելի բժիշկ, ես շատ եմ ցանկանում՝ ինձ օգնեք, քանի որ այս հարցիս շուրջ չեմ կարող ինչ-որ մեկի հետ զրուցել, որպեսզի կարողանա ինձ օգնել, վերջապես ինձ ընձեռնվեց հնարավորություն: Ունեմ մի խնդիր, որը չգիտեմ ինչից է, այն հետևյալն է. սեռական հարաբերության ժամանակ չեմ զգում ոչինչ, նույնիսկ հաճույքի մի փոքր նշույլ, որը և ազդում է հոգեբանությանս վրա: Եթե կարելի է խորհուրդ տվեք, թե ինչի՞ց կարող է լինել, և ինչպե՞ս շտկեմ դա: Շնորհակալություն:

Պատասխան

Այն գանգատը մեր լեզվով ասած կոչվում է սեռական անհեդոնիա, դա սեքսոլոգիական խնդիր է, որի հիմքում ընկած են հոգե-հուզական արգելակումներ: Այս արգելակումները գործում են սովորույթի ուժով, ամեն անգամ, երբ մարմինը պետք է սեքսուալ հակազդման արձագանքում տա, տագնապային լարվածությունը գործի է դնում նյարդային կենտրոնների այն շղթաները, որոնք բերում են նշված հոգե-հուզական բլոկների ակտիվացմանը և սեռական անզգայության առաջացմանը: Սեռական հաճույքի բացակայությունը ենթակա է բուժման, դուք մեղավոր չեք, որ Ձեզ մոտ նման խնդիր կա: Նաև հարկավոր չէ ամաչել կամ բարդույթավորվել այս պատճառով, քանի որ խնդիրն ի սկզբանե գալիս է մեր հասարակական, պատմա-մշակութային, ավանդական բարքերից և նաև կանանց սեռական օրգանների կառուցվածքային առանձնահատկությունից: Ինչպես տեսնում եք, նշված պատճառների մեջ ձեր հեղինակային դերը զրո է:

Փակել

Հաճույքի վայրկյաններ

1. Սեռական հարաբերության ժամանակ, կարելի է ասել, որ հաճույք չեմ ստանում, եթե լինում էլ է, շատ կարճ է տևում՝ 5-8վրկ: Սակայն ամուսնուս չեմ ասում այդ մասին, երբ ամեն անգամ հարցնում է.”լա՞վ է”, ասում եմ, որ այո: Չեմ ուզում, որ մտածի, թե իր պատճառով է, կամ ինքն ինձ չի բավարարում: Խնդրում եմ օգնեք, ի՞նչ կարելի է անել, ի՞նչը կօգնի ինձ:

Պատասխան

Սովորաբար, կանանց կողմից սեռական հաճույք չապրելը սերտորեն կապված է սեռական ցանկության բացակայության կամ սեռական անտարբերության հետ: Այս երկու սեռական դրսևորումները՝ ցանկությունը և հաճույքը փոխպայմանավորում են միմյանց, ինչքան ցանկալի է սեռական հարաբերությունը, այնքան արտահայտված է այդ մտերմության պատճառած հաճույքը, որն իր հերթին, է՛լ ավելի է խորացնում ցանկության ուժգնությունը: Այնուհանդերձ, եթե դուք զգում եք, որ սեռական ցանկության հետ կապված խնդիր չունեք, և անհանգստացնողը միայն հաճույքի բացակայությունն է, ապա այստեղ առավել հավանական է, որ չի կիրառվում բավարար սեռական գրգռում: Ձեր ասած կարճատև հաճույքը ստվերային զգացողություն է, որը չի կարող արթնացնել և բորբոքել սեռական կիրքը:
Խնդիրն ավելի է բարդանում, երբ կինն ամուսնու հանդեպ ունենում է մեղավորության և վախի զգացում` կարծելով՝ թե որպես կին թերի է և այդ մասին նախօրոք չի ասել ամուսնուն: Որոշ կանայք էլ բարդույթավորվում են այն ներթաքույց մտքից, որ իրենք դեռ պատրաստ չէին սեռական կյանքի և ամուսնական պարտավորություն են ստանձնել ստիպված՝ արտաքին հանգամանքների բերումով: Շփոթեցնող է նաև այն միտքը, որ սեռական հաճույքի բացակայությունն ընդհանրապես ամուսնուց կախված չէ և երբևէ պետք չէ պատճառը նրա մեջ փնտրել:
Պետք չէ մտածել, որ Ձեր ամուսինն իրեն վատ կզգա, երբ իմանա, որ Դուք լիարժեք հաճույք չեք ստանում սեքսից։ Ընդհակառակը, նա ուրախ կլինի Ձեր անկեղծության համար և ավելի բարձր ինքնագնահատական ձեռք կբերի, եթե իր և մասնագետի համատեղ օգնությամբ Ձեր սեռական խնդիրը լուծում ստանա: Ճշմարտությունն ասելով ու վախը հաղթահարելով` Դուք առաջին քայլը կատարած կլինեք խնդրի լուծման գործում, քանի որ Ձեր խնդրի ամենախորքային շերտերում ընկած է այն խնդիրը, որ դուք վախենում եք լինել ով կաք, այլ կաք, ով ՙՙպետք է՚՚ լինի: Եթե Ձեր կողմից սեռական հաճույքի բացակայության մասին իմանալով` նա նույնպես բարդույթավորվի, ուրեմն` հավանաբար նրա մոտ նույնպես առկա են որոշ խնդիրներ, քանի որ կնոջից սեռական ինքնագնահատական ակնկալող տղամարդիկ, իրականում ցածր ինքնավստահություն ունեցող տղամարդիկ են: Այս խնդիրը իր հերթին լուծման կարիք կունենա:

Փակել

Սեռական տհաճություն

1. Բարև Ձեզ հարգելի Նարինե: Օգնեք ինձ: Մի բան եմ ուզում հարցնել. ես ամուսնացած եմ ու ինձ համար տհաճ է դարձել սեռական կյանքը: Ոչինչ չեմ զգում, ուզում եմ ամիսը մեկ անգամ լինի, իսկ ամուսինս շատ կրքոտ է՝ ամեն օր է ուզում: Ես նյարդայնանում եմ դրանից: Ի՞նչ անեմ:

Պատասխան

Սեռական ցանկության նվազումը և տհաճության զգացումը սեքսոլոգիական խանգարումներ են համարվում, որոնք ունեն առաջացման հատուկ պատճառներ և զարգացման մեխանիզմներ: Ընդհանուր ասած այդ պատճառները խմբավորվում են երկու մեծ խմբում՝ հոգեբանական և ֆիզիկական: Ֆիզիկական պատճառներն են այս կամ այն հիվանդության կամ ախտաբանական վիճակի առկայությունը, որոնք այլ նշաններով չեն երևում և դուք չգիտեք այդ մասին, օրինակ՝ հորմոնալ շեղում կամ համակարդային հիվանդություններ, բայց ավելի հաճախ տհաճության առկայությունը լինում է նևրոտիկ բնույթի խանգարումների ժամանակ: Այս կարգի խանգարումները առաջանում են ամուսնական կյանքի փորձություններին չդիմակայելու դեպքում, իսկ դրանք շատ են և ամենօրյա ստեղծագործական լուծում են պահանջում։ Հակառակ դեպքում անձը կորցնում է իրականության զգացումը և չի կարող դրսևորել իրավիճակին համապատասխան հուզական հակազդումներ: Նմանատիպ վիճակներում զգայական շոյանքները, որոնք սովորաբար հաճույք են պատճառում, դառնում են տհաճ, ոչ ցանկալի: Հնարավոր է, որ նևրոտիկ խանգարման հետ մեկտեղ առկա լինի դեպրեսիվ տրամադրություն, որն էլ ավելի կխորացնի սեռական սառնությունը: Այս կարգի խնդիրները բժիշկ-սեքսոլոգի օգնությամբ լուծվող խնդիրներ են, ընդ որում խորհուրդ չի տրվում շատ հետաձգել բուժումը, քանի որ խնդիրը խորանալու միտում ունի:

Փակել

Կանանց սեռական ինքնաբավարարում

Հայտնի է այն փաստը, որ մեծ թվով կանայք դիմում եմ սեռական ինքնաբավարարման: Եթե հաշվի առնենք, որ կնոջ սեքսուալության հիմնասյունը վերարտադրման նպատակով տղամարդուն գրավելու և ներթափանցման ենթարկվելու ձգտումն է, ապա ինքնաբավարարումը, որը չի ծառայում վերարտադրմանը, կարող է դիտարկվել իբրև հավելյալ բաղադրիչ, որը համալրում է կնոջ սեքսուալությունը: Ո՞րն է այդ հավելյալ նշանակությունը:

Ժամանակակից սեռագիտության հավաստի փաստերը վկայում են, որ կանայք` ի տարբերություն տղամարդկանց, տարբերվում են սեռական հաճույքին էական կարևորություն տալու իրենց մոտեցմամբ: Ուրեմն կարելի է կասկածի տակ առնել այն ենթադրությունը, որ կանանց ինքնաբավարարումից ստացված հաճույքը տղամարդկանց պես էռոտիկ զգայունության և հեշտանքի վերապրումն է, թեև չի բացառվում նաև այս տարբերակը:

Երբ կինը պարզում է, որ ինքնուրույն կարող է հասնել հաճույքի և հեշտանքի, երբ գիտի, որ ինքն է խաղի հեղինակը և գործում են իր իսկ սահմանած խաղի կանոնները, ապրում է մի տեսակ ամենակարողության զգացում, որի շնորհիվ հեղաշրջվում է իգական սեռի մասին թույլ, թերի, կիսատ լինելու իր պատկերացումը:

Բացի այդ ձեռնաշարժությունը թույլ է տալիս մեջտեղից հանել տղամարդուն, վանել նրա կողմից հարուցվող բոլոր հավանական վախերը: Ինքնուրույն հեշտանքի հասնելու հնարավորությունը կանանց համար դառնում է կախվածությունից խուսափելու միջոց: Այսպիսով ինքնաբավարարումը տալիս է ամբողջականության, ապահով ինքնուրույնության, անկախության և հավերժության զգացում: Ահա թե ինչու` երբեմն այդքան դժվար է դառնում ձեռնաշարժությունից հեշտորեն հրաժարվելը:

Եվ եթե չլիներ կնոջ սեքսուալության հիմնական առանցքը, այն է վերարտադրման բնազդը, ապա մարդկությունը կկանգներ բնաջնջման եզրին: Ուստի երբ ձեռնաշարժությունը դառնում է սեռական կարիքի բավարարման և հաճույք ստանալու միակ ձև, ի հայտ է գալիս ներքին կոնֆլիկտ սեփական սեքսուալության հետ և այստեղ է, որ ծնվում են հեշտոցային անզգայությունը, սեռական գրգռման խանգարումը և կնոջ անօրգազմիան:

© 2017 | ՆարինԷ Ներսիսյան | Բոլոր իրավունքները պաշտպանված են |

Besucherzahler
счетчик посещений